«Қиммат»

«Қиммат» Мижоз «қиммат экан» деганда, кўпчилик дарров чегирма ҳақида ўйлайди. Менимча, бу катта хатолардан бири. Чунки аксарият ҳолатда мижоз бизни рақобатчи билан эмас, ўзининг арзонроқ варианти билан солиштираётган бўлади. - Ўзимиз қилиб кўрамиз. - Битта одамнигина ўргатамиз. - Оддийроқ ечим танлаймиз. - Кейинроқ қиламиз. - Ёки умуман ҳеч нарсани ўзгартирмаймиз. Шу ердан бошлаб суҳбат нарх ҳақида эмас. Танловнинг оқибати ҳақида бўлади. Арзонроқ қилиш мумкинми? "Албатта мумкин" дейман. Деярли ҳар доим мумкин. Лекин савол бошқа: Нимадан воз кечаяпсиз? - Баъзан қўллаб-қувватлашдан. - Баъзан тезликдан. - Баъзан эса шу ишни ўнлаб марта қилган одамларнинг тажрибасидан. - Айрим ҳолатларда эса тежалган пул билан бирга натижа ҳам йўқолади. Фақат бу дарров сезилмайди. Мен бир нарсани кўп кузатиб келаман. Тадбиркорлар одатда қиммат олгани учун эмас, нотўғри жойда тежаганлари учун пул йўқотади. Арзонроқ ечим танлайди. Шошилиб қарор қабул қилади. «Ҳозирча шундай кетаверсин», дейди. Кейин эса ойлаб ўша қарорнинг оқибатини тўғрилаш билан юради. Охирида чиқим бошидаги тежамдан анча қимматга тушади. Шунинг учун мен учун асосий савол «қимматми ёки арзонми» эмас. Асосий савол бошқа: Бизнес учун бир йилдан кейин қайси бири қимматроққа тушади - бугун кўпроқ тўлашми ёки бугун хатога йўл қўйишми? Чунки харид нархи дарров кўриниши мумкин. Хатонинг нархи эса кейин келади. Одатда огоҳлантирмасдан келади. --- Рақамларни ҳисобланг, бизнес билан шуғулланинг!